Քթախոսությունը (ռնգախոսություն) ձայնի հնչեղության խիստ թուլացումն է,
ինչպես նաև ձայնի երանգի փոփոխությունը, որը զուգակցվում է խոսքի
հնչյունների աղավաղման հետ: Առաջանում է ձայնառաջացման և արտաբերական
գործընթացներում քթի խոռոչի մասնակցության խանգարումների հետևանքով:
Քթախոսությունն առաջանում է քթի և քթըմպանի հիվանդությունների ժամանակ,
որոնք ուղեկցվում են քթային շնչառության խանգարումներով` քթի միջնապատի
ծռումներ, քթային խեցիների մեծացում, քթի գեղձանմանների և պոլիպների
առկայություն: Նման դեպքերում ձայնը խլանում է, աղավաղվում են << մ
>> և << ն >> հնչյունները, արտաբերվում են որպես
<< բ >> և << դ >>: Քթախոսության պատճառ կարող են
լինել նաև փափուկ քիմքի ֆունկցիայի խանգարումը` դրա լուծանքի, բնածին ոչ
սերտաճման դեպքում, փափուկ և կարծր քիմքերի վնասումները, ինչպես նաև
դիֆթերիայի ժամանակ քթըմպանի ախտահարումը: Նման դեպքերում մի շարք
հնչյուններ արտաբերելիս քիմային վարագույրը չի հպվում ըմպանի հետին պատին և
բերանաըմպանը չի բաժանում քթըմպանից, որի հետևանքով օդն անցնում է ոչ
միայն բերանով, այլև քթով: Այդպիսի քթախոսությունը սովորաբար խիստ
արտահայտված է, և խոսքը պարզահունչ չէ: Ժամանակին բժշկի դիմելով`
հիվանդության բոլոր ձևերը կարելի է վերացնել: Երեխաների քթախոսությունը
հնարավոր է վերացնել լոգոպեդական վարժություններով: Փափուկ և կարծր քիմքի
ոչ սերտաճումը շտկվում է պլաստիկ վիրահատությամբ:
