Սրտային հեղձուկը շնչարգելության նոպա է, որն առաջանում է սրտի հիվանդություններից:
Պատճառներ
Սրտային հեղձուկը կարող է առաջանալ սրտամկանի ինֆարկտից, սրտի իշեմիկ հիվանդությունից, բնածին և ձեռքբերովի սրտի արատներից, հիպերտոնիկ հիվանդությունից և այլն: Ենթադրվում է, որ սրտային հեղձուկի պատճառը սրտի ձախ փորոքից աորտա արյան վատ մատակարարումն է, որի հետևանքով թոքերում առաջանում են արյան կանգային երևույթներ և գազափոխանակության խանգարում: Արյան մեջ ավելցուկային ածխաթթվից գրգռվում է գլխուղեղի շնչառական կենտրոնը, որի հետևանքով առաջանում է ուժեղ հևոց: Նոպայի առաջացմանը նպաստում են ֆիզիկական և հոգեկան լարումները:
Պաթոգենեզ
Սրտային հեղձուկը ավելի հաճախ առաջանում է գիշերը, հիվանդը հանկարծակի արթնանում է օդի անբավարարության զգացումից և նստում անկողնում: Հևոցը սաստկանում է, ի հայտ են գալիս հազ (թափանցիկ փրփրոտ խորխով), ուժեղ թուլություն, անհանգստություն, սառը, կպչուն քրտինք, մաշկը դառնում է մոխրակապույտ: Ծանր դեպքերում նոպան ավարտվում է թոքերի այտուցով:
Բուժում
Քանի որ սրտային հեղձուկը կյանքին վտանգ սպառնացող վիճակ է, ուստի անհապաղ պետք է բուժվել: Հիվանդին պետք է հարմար նստեցնել (ոտքերը կախ գցած), սենյակն օդափոխել, հնարավորության դեպքում թթվածին տալ (թթվածնային բարձիկով) և շտապ բժշկական օգնություն կանչել: Ժամանակին բուժման դեպքում հիվանդության ելքը մեծ մասամբ բարեհաջող է:
Կանխարգելում
Պետք է հիվանդությունը ժամանակին և կանոնավոր բուժել, քանզի այն կարող է վերածվել սուր սրտային անբավարարության:
