Գլխացավը տարբեր հիվանդությունների ժամանակ հաճախակի հանդիպող ախտանշան է:
Պատճառներ
Գլխացավի առաջաման պատճառը հանդիսանում է գլխի անոթների կամ գլխուղեղի թաղանթների նյարդային վերջույթների գրգռումը: Գլխացավը կարող է առաջանալ նաև գլխի և պարանոցի մկանների գերլարվածության, տեսողության գերլարման, աչքի հիվանդությունների (օրինակ` գլաուկոմա) դեպքերում, աշխատանքի ժամանակ գլխի ոչ ճիշտ դիրքից և այլն: Հաճախ գլխացավը կապված է քթի հավելյալ ծոցերի հիվանդությունների հետ: Այն կարող է լինել նաև գանգագլխուղեղային վնասվածքի հետևանք:
Պաթոգենեզ
Անոթային հիվանդությունների ժամանակ գլխացավը հաճախ լինում է բաբախող և ուժեղանում է ծխելուց, գերհոգնածությունից, ալկոհոլ օգտագործելուց, ինչպես նաև ուժեղ գրգչիչների ազդեցությունից (աղմուկ, ուժեղ լույս և այլն): Հիպերտոնիկ հիվանդությամբ տառապողներին հաճախ քնից հետո անհանգստացնում են գլխում ծանրության զգացումը և ծոծրակում ճնշող ցավը: Անգարի ժամանակ ցավը լինում է նոպայաձև. ցավում է գլխի կեսը: Եռվորյակ և ծոծրակային նյարդերի նյարդացավերի ժամանակ առաջանում են դեմքի և ծոծրակի այրող ցավեր: Գլխուղեղի բորբոքման և ուղեղապատյանաբորբի դեպքերում գլխացավն ուղեկցվում է փսխումով, գիտակցության մթագնումով և բարձր ջերմությամբ:
Բուժում
Օդափոխված սենյակում քունը հաճախ մեղմացնում է գլխացավը, սակայն համառ գլխացավի դեպքում անհրաժեշտ է դիմել բժշկի և պարզել պատճառը: Անհրաժեշտ է ժամանակին բուժել հիմնական հիվանդությունը: Ինքնուրույն երկար ժամանակ ցավազրկող դեղամիջոցների օգտագործումը կարող է չվերացնել գլխացավի չատճառը և ունենալ բացասական հետևանք:
