24-ամյա Դանիել Յալլոպը երակների թրոմբոզ է ստացել, քանի որ շատ է սիրում սպորտով զբաղվել: Բժիշկները հաստատել են, որ թրոմբն առաջացել է հաճախակի մարզումների հետևանքով: Հայտնի է, որ աղջիկը մարզվում էր շաբաթական 5 օր: Նրան փրկելու համար բժիշկները ստիպված էին հեռացնել կողոսկրը:
Սովորաբար, խորը երակների թրոմբոզը կապում են երկար անշարժության հետ, օրինակ երկարատև թռիչքների ժամանակ: Դանիելի դեպքում պատճառն այլ էր: Աղջիկը որոշեց դիմել բժիշկներին այն բանից հետո, երբ կոշտացում հայտնաբերեց ձեռքի տակ: Հաջորդ օրը նրա ձեռքն այտուցվեց: Այդ ժամանակ բժիշկները նրա մոտ ախտորոշեցին թրոմբոզ: Նրան նշանակեցին արյունը ջրիկացնող դեղամիջոցներ և անցկացրեցին կողոսկրի հեռացման վիրահատություն: Դա օգնեց նվազեցնել զարկերակների վրա գործադրվող ճնշումը:
Պրոֆեսոր Մո Բագնահեյդը Մանչեստերի Ալեքսանդրայի հիվանդանոցից վիճակն անվանեց «թրոմբոզ` առաջացած մեծ ճնշումից»: Բանն այն է, որ մարզումների ժամանակ մկանները ձգվում են և սեղմում են անոթները: Հենց դա էլ կարող է խթանել թրոմբի առաջացումը: Եթե թրոմբը պոկվի, այն կհասնի թոքերին ու էմբոլիա կառաջացնի, ինչը մահացու է:
Պրոֆեսորի խոսքերով` վերջին երկու ամսվա ընթացքում նա բուժել է նմանատիպ խնդիրներով 3 հիվանդ: Նրանք բոլորը մինչև 30 տարեկան էին: Այդ իսկ պատճառով նա խորհուրդ է տալիս չտարվել սպորտով և ծանրաբեռնվածությունն աստիճանաբար ավելացնել:
